બાપા’ના સંઘશિષ્ય ‘બાપુ’એ ગળગળા થઈને કહ્યું: ‘કેશુભાઈ ભોળા હતા, તેમના ખભે બેસનારા આજે દિલ્હી-ગાંધીનગરની ગાદીએ છે, તેમને CMપદેથી હટાવવાનું મને દુ:ખ’

બાપા’ના સંઘશિષ્ય ‘બાપુ’એ ગળગળા થઈને કહ્યું: ‘કેશુભાઈ ભોળા હતા, તેમના ખભે બેસનારા આજે દિલ્હી-ગાંધીનગરની ગાદીએ છે, તેમને CMપદેથી હટાવવાનું મને દુ:ખ’

ગુજરાત ભાજપના દિગ્ગજ નેતા અને ભૂતપૂર્વ મુખ્યમંત્રી કેશુભાઈ પટેલનું આજે 92 વર્ષની વયે નિધન થયું છે. સમગ્ર ગુજરાતમાં શોકનો માહોલ છવાઈ ગયો છે. શોકની ઘડીએ દિવ્ય ભાસ્કરે કેશુભાઈ પટેલના એક સમયના સાથી અને બાદમાં રાજકીય હરીફ બનેલા ભૂતપૂર્વ મુખ્યમંત્રી શંકરસિંહ વાઘેલા સાથે વાત કરી હતી. કેશુભાઈએ 11.55 વાગ્યે અમદાવાદની ખાનગી હોસ્પિટલમાં અંતિમ શ્વાસ લીધા હતા. દિવ્ય ભાસ્કરના એડિટર મનીષ મહેતાએ 12.30 વાગ્યે કેશુભાઈના સંઘશિષ્ય શંકરસિંહ સાથે વાત કરી હતી. જૂના સાથીને ગુમાવવાનું દુ:ખ શંકરસિંહના અવાજમાં વર્તાતું હતું. ફોન પર વાત શરૂ કરતાં પહેલાં શંકરસિંહ બે મિનિટ તો કંઈ બોલી જ નહોતા શક્યા. ધીમે ધીમે તેમણે જૂના સાથી સાથેનાં સંસ્મરણો વાગોળવાનું શરૂ કર્યું હતું. વચ્ચે વચ્ચે તેઓ ભાવુક બનીને વાત કરતાં અટકી જતા હતા.

માનનીય કેશુભાઈ પટેલ આપણી વચ્ચે નથી રહ્યા. હમણાં જ તેમના દુ:ખદ નિધનના સમાચાર મળ્યા. અમારે છેલ્લાં 52-54 વર્ષના સંબંધો હતા. આ પક્ષમાં કે પેલા પક્ષમાં, હોદ્દા પર હોય કે વિપક્ષમાં હોય, જ્યાં હોય ત્યાં, અમારે દુ:ખે દુ:ખી અને સુખે સુખીના સંબંધો હતા. કેશુભાઈ પટેલ સાથે પારિવારિક સંબંધો પણ હતા. મારા બાપુને તેમના ઘરે જવાની છૂટ હતી. કેશુભાઈ ગાંધીનગરમાં ભેંસ રાખીને રહેતા હતા. તેમનાં પત્ની લીલાબા જે વહેલાં સ્વર્ગવાસી થઈ ગયાં. તેમને ક્યારેક ઘાસની જરૂર પડે કે બાજરો ખાવાની ઈચ્છા થાય તો મારા બાપુજી વ્યવસ્થા કરતા.

કેશુભાઈ ભલે પોતે બહુ શિક્ષિત નહોતા, પણ દીર્ઘદ્રષ્ટા અને કોઠાસૂઝવાળા હતા. તેઓ માર્ગદર્શક પણ કાર્યકર્તાઓને આપતા હતા. તેમણે ગુજરાતના ગ્રામ્ય વિસ્તાર, ખેડૂત અને ખેતી માટે ખૂબ કામ કર્યું હતું. તેમણે નર્મદાના પ્રશ્નને એક પ્રેસ્ટીજ ઇશ્યુ બનાવ્યો હતો. તેઓ માનતા કે આનો ઉકેલ આવવો જોઈએ. આ રીતે તેમણે ગુજરાતને નર્મદાની દેન આપી હતી. ગામડાં માટે ‘ગોકુળ ગ્રામ’ની યોજના દાખલ કરેલી. કોઠાસૂઝવાળા કેશુભાઈ કાર્યકર્તાઓને પ્રેમથી સાચવતા.

વધુ વાંચો

Leave a comment